மே 5 : ஸாண்ட்விச்சும் குவாக்கமோலேயும் சாப்பிடும் அமெரிக்கா (இன்று கிழமை வியாழன்-4)

மே 5 : ஸாண்ட்விச்சும் குவாக்கமோலேயும்  சாப்பிடும் அமெரிக்கா 

(இன்று கிழமை வியாழன்-4)

அமெரிக்காவில் 24 ஆவது நாள் 

(அட்லாண்டிக் கடலோரம்)

தேசீய ஹாகி தினம்

மே மாதம் ஐந்தாம் தேதியை அமெரிக்காவில் - குறிப்பாக- பிலடெல்பியா நகரில்  தேசீய “ஹாகி”  -Hagie - அல்லது -Hoagie தினமாகக் கொண்டாடுகிறார்கள். 

உலக யுத்தத்தின்போது பிலடெல்பியாவின் கப்பல்காட்டும் தளமாக இருந்த   ஹாக்  (Hog) தீவில் 1953 வாக்கில் பணியில் இருந்த இத்தாலியர்கள், தங்கள் பகல் உணவிற்கு ஒரு புதிய உணவைத் தயாரித்து எடுத்துவந்தார்கள். இரண்டு ரொட்டித்துண்டுகளுக்கு நடுவில் சீஸ், லெட்டூஸ், மாமிசம் போன்றவற்றை வைத்து மூடி அவர்கள் செய்த உணவு வடிவத்திற்கு “ஸாண்ட்விச்” என்ற பெயர் கொடுக்கப்பட்டது. அது ஹாக் தீவில் இருந்து கிளம்பியதால் ‘ஹாகி’ ஸாண்ட்விச் அல்லது வெறுமனே “ஹாகீ” என்றே அழைக்கப்படலானது.  

1992இல் பிலடெல்பியா மேயராக இருந்த எட்வர்டு ரெண்டெல் “ஹாகீ”யை பிலடெல்பியாவின் “அதிகாரபூர்வ” ஸாண்ட்விச்சாக அறிவித்தார்! (பின்னாளில் அவர் பென்சில்வேனியா மாநிலத்தின் கவர்னராகவும் ஆனார். அதற்கு இந்த ஸாண்ட்விச் தான் காரணமா என்று தெரியவில்லை).        

(அமெரிக்காவில் எதைத்தான் அதிகாரபூர்வமான பொருளாக அறிவிக்காமல் இருப்பார்களோ அதுவும்  தெரியவில்லை!)

“ஸின்க்கோ -டி -மேயோ” திருநாள் 

மே  5ஆம் நாள் அமெரிக்காவில் உள்ள மெக்சிகன் மக்களால் மட்டுமன்றி, ஸ்பானிஷ் மொழிபேசும் அனைவராலும்  கொண்டாடப்படும் நாள் “ஸின்க்கோ -டி -மேயோ” திருநாள் -அதாவது “மே 5 “ சுதந்திரத் திருநாள்.

உண்மையில் மெக்சிகோ நாட்டைவிட அமெரிக்க நாட்டில்தான் இது அதிக அளவில் கொண்டாடப்படுகிறது என்று தெரிகிறது. 1862 வாக்கில் நடந்த  அமெரிக்காவின் உள்நாட்டு யுத்தத்தில் ஈடுபட்ட மெக்சிகன்    வம்சாவளியினர் தங்களின் விடுதலைக்கான திருநாளாக மே 5 -ஐ  தேர்ந்தெடுத்தார்களாம். ஏனென்றால் அதே ஆண்டில்  பியூபிளா என்ற இடத்தில் பிரெஞ்சுப்  படைகளை சிறிய மெக்சிகன் படை வெற்றிகண்டது அந்த மே  5ஆம் நாளில் தானாம்.  படிப்படியாக அது வெற்றித் திருநாள் என்பதிலிருந்து மாறி, மெக்சிகன் பண்பாட்டின் அடையாளமாக  ஆகிவிட்டதாம். 

 2005 இல் அமெரிக்க பாராளுமன்றம், இந்த நாளை உரிய கௌரவத்துடன் கொண்டாடவேண்டுமென்று ஜனாதிபதியை உத்தரவு பிறப்பிக்க வேண்டுமென்று கோரியது. அதற்கேற்ப 150க்கும் மேற்பட்ட அதிகாரபூர்வ கொண்டாட்டங்கள் இந்த நாளில் நடத்தப்படுகின்றன.

மிக முக்கியமாக, மெக்சிகன் பாரம்பரிய உணவுகள் எங்கு பார்த்தாலும் விசேஷமாக விற்பனை செய்யப்படுகின்றன. வீடுகளிலும் அவரவர்கள் தயாரித்துக் கொண்டாடுகிறார்கள்.

எங்கள் பேரனுக்கு பேபிஸிட்டிங் செய்யும் பெரு நாட்டுப் பெண்மணி இன்று தானாகவே  முன்வந்து கோரிக்கைவைத்து மெக்சிகன் உணவான பாதாம் மாவிலிருந்து செய்யப்படும் “கேசடியா” (Quesadillas)வை, “குவாக்கமோலே” (guacamole) என்ற துவையல் மாதிரியான காரமில்லாத சட்னியுடன் எங்களுக்குச் செய்து தந்தார். சுவையாக இருந்தது. 

மனநிலை பிறழ்வை அவமதிப்பதை நிறுத்தும் நாள் 

தேசீய “Silence  the  Shame “ நாள் ஆகவும் மே 5ஆம் நாள் அனுசரிக்கப்படுகிறது. மனநிலை பிறழ்வு என்பது,  பிற நோய்களைப்  போலவே ஒரு நோய்தான், எனவே மனநிலை பிறழ்ந்தவர்களை அவமதிப்பதற்கு ஒன்றுமில்லை என்ற விழிப்புணர்வை ஊட்டும் நாள் இது. 

இந்த மே  5ஆம் தேதிக்கு இன்னும் பல சிறப்புகள் உண்டு.

1893இல் இந்த நாளில்தான் அமெரிக்க பங்குச் சந்தை மிகப்பெரிய வீழ்ச்சியைச் சந்தித்தது.

1818இல் இந்த நாளில்தான் கம்யூனிசத்தின் பிதாமகரான கார்ல் மார்க்ஸ் பிறந்தார்.

1920இல் இந்த நாளில்தான் அமெரிக்காவில் கம்யூனிஸ்ட் கட்சி தடை செய்யப்பட்டது. (உட்ரோ வில்சன் ஜனாதிபதி).

1821இல் இதே நாளில்தான்  நெப்போலியன் செயின்ட் ஹெலினா தீவில் சிறையில் மரணமடைந்தார். 

சரி இந்த மே 5ஆம் நாள் சென்னையில் என்ன சிறப்பு என்று கேட்கிறீர்களா? 

அதைத் தெரிந்துகொள்வதற்கு ஒரு நண்பருக்கு போன் செய்தேன். அவர் எடுத்து ஹலோ சொல்வதற்குள்  கட் ஆகிவிட்டது. போனில் சார்ஜ் தீர்ந்துவிட்டதாம். 

சரி என்று இன்னொரு நண்பருக்கு போன் செய்தேன். ஹலோ ஹலோ என்பது மட்டும் கேட்டது. வேறு ஒரு சத்தமும் வரவில்லை. டவர் இல்லையாம். அதாவது டவருக்கே சார்ஜ் இல்லையாம்! 

தொலையட்டும் என்று இன்னொரு நண்பருக்கு போன் செய்தேன். ஹலோ என்ற குரல் கேட்டது. அடுத்து தடால் என்று சத்தம் கேட்டது. போன் மட்டுமின்றி ஒரு காபி கோப்பையும் விழுந்து நொறுங்கும் ஓசை கேட்டது. வீட்டில் இரண்டு நாளாக கரண்ட் இல்லையாம்!..... 

-இராய செல்லப்பா நியூஜெர்சியில் இருந்து.